Ապահովական եւ նոր կառավարութիւն կազմելու թղթածրարները անգամ մը եւս դարձան, հանրապետութեան նախագահ Միշէլ Սըլէյմանի եւ հրաժարեալ վարչապետ Նեժիպ Միքաթիի միջեւ Պաապտայի պալատին մէջ կայացած հանդիպումին առանցքային օրակարգերը: Նախագահ Սըլէյման Պաապտայի պալատին մէջ գլխաւորեց ապահովական նիստ մը, որուն մասնակցեցան վարչապետ Նեժիպ Միքաթին, ներքին գործոց նախարար Մարուան Շարպէլը, ընկերային հարցերու նախարար Ուայէլ Ապու Ֆաուրը, ապահովական եւ զինուորական պատասխանատուներ: Նիստի ընթացքին քննարկուեցան սուրիացի գաղթականներուն մարդասիրական օժանդակութիւն հայթայթելու կարելիութիւնները: Նախագահ Սըլէյման յաջորդաբար ընդունեց փոխվարչապետ Սամիր Մուքպէլը, ընդհանուր անվտանգութեան ընդհանուր տնօրէն Ապպաս Իպրահիմը, Լիբանանի մօտ Միացեալ Նահանգներու դեսպան Տէյվիտ Հէյլը:
Հրաժարեալ վարչապետ Նեժիպ Միքաթի դիտել տուաւ, որ իրաւական եւ սահմանադրական տուեալներ չեն արտօներ, որպէսզի լիագումար նիստի հրաւիրէ հրաժարեալ կառավարութիւնը: Հետեւաբար իր կառավարութեան իրաւասութիւններէն դուրս կþիյնայ քննարկելու նաւթի թղթածրարը, ինչպէս նաեւ Միջազգային Ատեանը ֆինանսաւորելու օրակարգերը: